2018Ko GETXOKO KOMIKI AZOKA: Prentsarako txostena



AURKEZPENA

Descargar Dossier

Getxoko Komiki Azokaren 17. ekitaldia ospatuko du aurten. Urriaren 19tik 21era Getxo bineten munduaren zaleentzako derrigorrezko topalekua izango da ez bakarrik Euskal Herrian, baita kanpoan ere.

 

Aurten, bi gunetan izango da azoka. Batetik, Areetako Geltokia plazan liburu-denda, argitaletxe, merchandising-denda eta fanzineen 40 salmenta-gune baino gehiago bilduko dira eta bertaratzen direnek azken nobedadeak eskuratu eta sailak osatu ahal izango dituzte, baita komiki zaharrak, bildumagile-produktuak eta era guztietako merchandising-produktuak eskuratu ere.

 

Bestetik, Romo Kultur Etxeak jarduera-programa bizi-bizia hartuko du eta bertan, hiru egunez, nobedadeen aurkezpenak, hitzaldiak, mahai-inguruak, proiekzioak eta tailerrak izango dira, besteak beste.

 

Ohi denez, artista ospetsuek bisitatuko dute Getxo, horietako batzuk nazioartean sona handia dutenak, eta hitzaldi eta aurkezpenetan parte hartuko dute; sinadura-saioak ere egingo dituzte, zaleek gustukoen dituzten egileak ezagutzeko aukera izan dezaten. Sinatze-txandak Romo Kultur Etxean zein karpako saltokietan izango dira.

 

Aurtengo gonbidatuen artean nabarmendu behar dira, adibidez, Jason Lutes, Camille Jourdy, Marcos Martín, Natacha Bustos, Mamen Moreu, David Rubín, Anabel Colazo, Javier Pulido, Raquel Alzate. Horiekin batera, beste komikigile askok ere parte hartuko dute.

 

Egile gonbidatuen artean Nazario aipatu behar dugu bereziki, Espainiako underground komikiaren adierazle nagusietariko bat, hain zuzen ere. Gasteizko Zuloa liburu-dendarekin batera, omenaldia egingo zaio Getxon.

 

Komiki-erakusketak ez dira faltako Azokan. Hala, Bizkaia Zubian David Leoneren "Caóstica" izeneko erakusketa egongo da eta Romo Kultur Etxean, berriz, Marcos Martínen lanak izango dira ikusgai. Azokako karparen inguruan, Asisko egileren dedikatutako erakusketa egongo da eta, azkenik, Torrene Aretoan euskal komikiaren historia 1975. urtetik egun arte ezagutu ahal izango dugu.

 

Laburbilduz, Getxoko Komiki Azokak iraungo duen hiru egunetan eskaintza komertzial handiaz eta askotariko eta kalitatezko programazioaz gozatu ahal izango dugu; izan ere, komikiaren munduarekin zerikusia duten era guztietako jarduerak antolatu ditugu eta, gainera, sektoreko artista eta profesional gailenek parte hartuko dute. Horregatik guztiagatik, Getxoko azoka komiki-zaleentzako nahitaezko hitzordua da.

 

Hori guztia posible egiteko, Getxoko Udalak Bizkaiko Foru Aldundiaren eta Eusko Jaurlaritzaren kultura sailen, Bilbao Bizkaia Kutxako Gizarte Ekintzaren, El Correoren eta Metro Bilbaoren laguntza ezinbestekoa dugu.